മദം

ആന പിറകെയുണ്ടെങ്കില്‍ സ്വപ്നങ്ങള്‍ എനിക്ക് ചിറകുകളും തന്നു.

ആനയുടെ കുതിപ്പിനും എന്റെ പറക്കലിനുമിടയിലെ ദൂരമായിരുന്നു

അന്നെന്റെ സ്വാതന്ത്ര്യത്തിന്‍ പിടച്ചിലുകള്‍

തെങ്ങോളം ഉയര്‍ന്നങ്ങിനെ സുരക്ഷിതയാവുമ്പോള്‍

പെട്ടെന്ന് മണ്ണോളം ചിറകുതളര്‍ച്ച

ആനയും ഞാനും തമ്മില്‍ ഒരു ശ്വാസത്തിന്റെ അകലം മാത്രം

തൊട്ടു തൊട്ടില്ല എന്നാകുമ്പോള്‍ വിയര്‍പ്പിലേക്കുണര്‍ന്ന്

എന്റെ ആത്മഹര്‍ഷം.

പറക്കമുറ്റിയപ്പോള്‍ പൂരപ്പറമ്പിന്റെ ആര്‍ത്തലക്കുന്ന സ്വാതന്ത്ര്യത്തില്‍

വെയില്‍ക്കിളികള്‍ എന്റെ ചില്ലകളില്‍ നിന്നും വിയര്‍പ്പിന്‍ കായ കൊത്തിയെടുക്കുമ്പോള്‍

ഒരിക്കല്‍ ഞാനുമറിഞ്ഞു മദം പൊട്ടിയ മനുഷ്യരെ,

ആള്‍ക്കൂട്ടത്തില്‍ അവര്‍ക്ക് മുഖമില്ലായിരുന്നു.